quam de aromaticis litteris vestris pigmenta pandentibus circumductione
fragrantiam odoravi finaliter et subiectibiliter adoravi. Cuius instantia,
spe fertili, nutrior et pingue sumo presagium de futuris, ut, qui
vacationis hoc tempore, curis illis prementibus vacuus secum sistens, gratam
mei voluit habere memoriam, sic sibi tenaciter utinam primordia
cepte dignationis habituet, quod, succedente plenitudine temporis, qua
virtutem suorum operum arduis habet reformare negotiis, devotionis
integre mee signum de libro memorie, per applicanda maioribus interstitia,
non obducat.
Domino I. Nicolaus de Rocca.
Ecce nunc tempus acceptabile. Ecce nunc dies salutis appropinquat et
pacis, in quo, favente divina clementia, inter orbiculares columpnas innate
discordie determinatio creditur et desiderata innuitur temporum festivitas
futurorum. Quibus advenientibus, ne propter vestri consensus notitiam
videar aliquid attemptare, qui datus mihi estis pater et dominus post
secundum, veniendi Neapolim vel curiam visitandi precepta ponatis et
adverbii negativi vel affirmativi regulam vestris litteris mittatis expressam,
ut pater me gratum sibi sentiat, dum mandatorum vestrorum me
inveniat inexpertem.
|
|