1. Donato Guadagni.
Fili Donate, sic enim possum et teneor et licet dicere, cum patris affectione
te diligam, quia pater tuus me dilexit ut filium. In hoc refert, quia
ille mihi manus porrexit adiutrices, ego non tibi, nisi animo, quia non
potens, dabit deus sicut spero et quod utinam sit quam maturissime.
Cognosces enim me patrem alterum non ingratum. 2. Ego summe letor
quod, clare indolis puer, exacte matureque, ut ferunt, etatis mirum
portendis puerilia quoque suppeditans, studiorum cupidus, preceptoris
reverens, morum amantissimus, conviventium coetanorum, quos virtuosos
sentis, domesticus discretusque conversator, infracti animi et
ad magna tendentis, turpium inimicus. 3. Fac igitur, fili, ut bene cepta
prosequaris, nullis etatis lubrice illecebris captus, ut laborum tuorum
expectatissimos fructus parentes tui sic percipiant, ut metentes impleant
manus et manipulos colligant fructuosos. Ipsi enim egoque operam dabimus
quo facilius habiliusque studiis assumptis immoreris. Interim
quantum etas tenera patitur enitaris ut virtuosa principia coequali fide
concludas, quod perfacile futurum speramus, ubi volueris. Nihil enim
volenti difficile. Audi, quod forte legisti aut lecturus es:
Nihil mortalibus ardui est:
celum ipsum stultitia petimus neque
per nostrum patimur scelus
iracunda Iovem ponere fulmina.
4. Quantumque moribus studiisque processeris, age ut tuis edoctus literis avidissimus
ediscam. Magno mihi gaudio futurum, ubi te didicisse monstrabis.
|
|