cum meo spiritu tradere hujusmodi Satanae ( ibidem ).
In secunda vero laudantur, et ut magis ac magis
proficiant commonentur. Galatae vero jam nullius
criminis arguuntur, nisi hujus tantum quod callidissimis
pseudoapostolis crediderunt. Ephesii sane
nulla reprehensione, sed multa laude sunt digni,
quia fidem apostolicam servaverunt. Philippenses
etiam multo magis collaudantur, qui nec audire
quidem falsos apostolos voluerunt. Thessalonicenses
nihilominus in duabus epistolis omni laude prosequitur,
eo quod non solum fidem inconcussam servaverint
veritatis, sed etiam in persecutione civium
fuerint constantes inventi ( II Thes. II, c.). Colossenses
autem tales erant, ut cum ab Apostolo visi
corporaliter non fuissent, hac laude digni haberentur:
Etsi corpore , inquit, absens sum, sed spiritu
vobiscum sum, gaudens et videns ordinem vestrum
( Col. II, a.). De Hebraeis vero quid dicendum est?
quorum Thessalonicenses qui plurimum laudati
sunt, imitatores facti esse dicuntur. Sicut ipse ait:
Et vos fratres imitatores facti estis Ecclesiarum Dei
quae sunt in Judaea. Eadem enim passi estis et vos
a contribulibus vestris, quae et illi a Judaeis ( I Thes. II, c.).
Apud ipsos quoque Hebraeos eadem commemorat
dicens: Nam et vinctis compassi estis, et rapinam
bonorum vestrorum cum gaudio suscepistis,
cognoscentes vos habere meliorem et manentem substantiam
( Heb. X, 34).
|
|