terris teneant quoadusque ipse mare transeat, et inter uos et
ipsos uicecomites per semetipsum causas uestras audiat.
Libenter uellem uobiscum loqui. De qua re si uobis uoluntas
est mandate michi ad quem locum possimus conuenire, et de
rebus uestris ac domini nostri regis colloquium habere. Ego uero
paratus sum uenire uobis obuiam quocunque preceperitis.
Rogo ut harum litterarum portitori nomine Beringerio iusticiam
faciatis de illis hominibus super quos clamorem facit pro equo suo,
quem furto sibi ablatum dicit.
Omnipotens Dominus uos benedicat, et uitam uestram in
omni bonitate disponat.
32
Lanfrancus gratia Dei archiepiscopus dilectissimo filio et amico
R. comiti salutem et benedictionem.
Auditis de te quae audire nollem, doleo quantum dicere non
possum. Neque enim deceret ut filius Willelmi comitis – cuius
prudentia et bonitas et erga dominum suum et omnes amicos suos
fidelitas multis terris innotuit – infidelis diceretur, et de periurio
uel fraude aliqua infamiam pateretur. Immo conueniret potius ut
filius tanti uiri imitator patris existeret, et omnis bonitatis et
fidelitatis aliis exemplum preberet. Propterea rogo te dulcissime
fili et carissime amice quatinus propter Deum et honorem tuum si
culpam de tali re habes, resipiscas; si uero non habes, manifestissimis
documentis te non habere ostendas. Quicquid uero sit rogo
ut ad me uenias, securus proculdubio quod neque in eundo
neque in redeundo per nos uel per regios homines impedimenti
aliquid patieris.
Omnipotens Dominus te benedicat. |
|