Pag 61

Unus etiam de filiis regis Tristanus, tunc temporis letali valetudine oppressus, de medio est
sublatus. Post mortem itaque dilecti filii rex devotissimus disenterie morbo correptus, videns
sibi diem ultimum imminere, negotiis regni et exercitus congrue ordinatis, et effusis precibus
lacrimosis ad Deum, ut esset populo ibi adunato sanctificator et custos, viam universe carnis
est ingressus.
Post obitum autem benignissimi regis, filius eius Philippus qui tunc erat in castris cum
patre, regni Francie obtinuit diadema; rex autem Karolus post regis obitum capitaneus exerciti
est constitutus. Et rex novus Philippus illustris et rex Navarie venientes a Carthagine
audacter exercitum ante muros Tunicii produxerunt, Saraceni, qui de totius Africe partibus
venerant in auxilium civitatis terga vertentes, tentoriis et tuguriis in campo cum omni suppellectile
derelictis. Adhuc cum exercitu suo nondum advenerat clarissimus Odoardus. Rex
autem Tunicensis, considerans multitudinem Africanorum non posse sustinere impetum populi
christiani, nimio perterritus, compositionem pacis a regibus postulabat. Reges, tum propter
difficultatem urbem munitissimam capiendi, tum propter pestilentiam mortalitatis, que vehementer
exercitum affligebat, tale pactum cum rege Tunicii pepigerunt: quod ipse persolveret
regibus omnes transfetationis expensas et tributum redderet regi Karulo et filiis suis, quod ipse
solebat persolvere annuatim magno principi Federico. Hoc superadditum est in pacto, quod
quamdiu erit bellum contra Saracenos in partibus transmarinis, dare stipendia tribus milibus
militum teneatur. Rex itaque ditissimus hec et alia que reges christiani petierunt, facere compromisit,
et, apertis thesauris suis, opere protinus adimplevit. Dum hec agerentur, applicuit
ad portum Carthaginis cum classe maxima probissimus Ogdoardus. Postquam fuerunt pacis
federa celebrata, exercitum in Siciliam remeavit; sed vento vehementi contrario existente,
in portu Trapani naves plurime sunt confracte, in quibus maxima multitudo hominum est
submersa.