IOACHIM: Arcus fortium superatus est et infirmi accinti sunt robore. Deponit
potentes de sede et exaltat humiles, esurientes implet bonis et divites
dimittit inanes. Suscepit Israel puerum suum recordatus misericordie sue . Non
dicit: «Recordatus operum suorum bonorum», set: Recordatus misericordie
sue . Quare? Quia non volentis neque currentis, set miserentis est Dei . Voluit
enim Esau benedictionem, cucurrit obedivit et non obtinuit, quia misertus est
Deus Iacob – qui erat velud abiectus in domo patris sui – eo quod esset minor
etate et simplicitate, ut qui gloriatur in Domino glorietur et non in se.
Vis autem scire quod abiectio vel miseria sit proprie causa divine electionis?
Audi ipsum Apostolum: videte, fratres, vocationem vestram, quia non multi
sapientes secundum carnem, non multi potentes, non multi nobiles, set que stulta
sunt mundi elegit Deus et contemptibilia . Ecce habes manifeste cur non volentis
neque currentis set miserentis sit Dei , cum liqueat luce clarius quod non pro
iustitia sua assumatur aliquis a Deo set pro miseria, non pro operibus set pro
exhilitate, non pro fortitudine set pro infirmitate, non pro sapientia set pro
stultitia, non pro nobilitate set pro ignobilitate. Set quid ista commemorare opus
est et non illud magis infero, quod phariseus ille repulsus est, ut ita dixerim, pro
iustitia sua, publicanus vero assumptus pro peccatis suis? Pro iustitia sua
inquam repulsum phariseum, publicanum vero pro peccatis assumptum, non,
quod absit, quia iniustitiam amat Deus et odit innocentie puritatem, set quia
repellit superbientem de iustitia, parcit autem humilibus penitentibus de peccatis.
Si enim quod altum est hominibus , ut testatur ipsa Veritas in evangelio,
abhominatio est apud Deum , adeo ut elatam quoque iustitiam spernat et suscipiat
humilem peccatorem, quanto magis abicere credendus est peccatores superbos,
utpote divites huius mundi, quibus dicitur: Ve vobis divitibus, qui habetis
consolationem vestram? Eligit autem humiles, quibus minor est peccandi materia,
utpote pauperes et afflictos, de quibus dicitur: Beati qui nunc lugent
quoniam ipsi consolabuntur .
|
|