CV. DE RESTITUTIONE DANNORUM NON FIENDA POST
LAPSUM ANNUM.
In nomine domini amen. anno nativitatis eiusdem MCCCLXXXIIII,
indictione septima, die tertio maii, reverendus in Christo pater et
dominus dominus Oldradus Dei gratia episcopus Novariensis et
comes statuit, ordinavit et decrevit quod dampna guasta seu
incendia que de cetero fieri contingant et extimari de quibus eddita
disponunt et statuta faciunt mentionem, si ipsorum restitutio petita
non fuerit iuditialiter per eum vel eos cui vel quibus competit actio
emenda seu restitutio inter annum a die restitutionis ipsorum facte
computandum, quod post lapsum ipsius anni non emendentur
nec restituantur et ulterius quis petens ipsorum restitutionem et
emendationem non audiatur et ipsius actio ellapso dicto anno sit
et esse intelligatur sublata et perempta.
Actum in castro Gaudiani presentibus testibus sapienti viro
domino Antonio de la Ecclesia de Mediolano iurisperito Ripperie
castellano et domino Azolino de Maineriis de Mediolano et
Guiglelmo Sozagi de Orta ad premissa notis et vocatis.
Ego Quiricus de Lamutia de Insula notarius et canzellarius dicti
patris premissis interfui et hanc cartam rogatus traddidi eamque ad
scribendum dedi notario infrascripto et me subscripsi.
CVI. DE DEBITORIBUS DOMINI EPISCOPI DETINENDIS.
Nos dominus Mediolani etc. comes Virtutum imperialis vicarius
generalis quibuscumque potestatibus capitaneis, vicariis, rectoribus
et offitialibus nostris ad quos presentes pervenerint litterarum
tenore mandamus quatenus ad omnen acquixitionem reverendi
patris domini episcopi Novariensis dillecti consciliarii nostri seu
quorumcumque eius offitialium detineant et detineri faciant realiter
et personaliter quoscumque quos constiterit fore ipsius domini
episcopi aut episcopatus sui debitores, et etiam quoscumque
bannitos territorii iurisdictionis ipsius domini episcopi quos
offitialibus suis consignent ad eorum petitionem secundum pacta
que cum prefato domino episcopo contraximus et hec aliquibus
nostris decretis super hoc editis non obstantibus.
|
|