parte erat, violenter eiecerunt cum omnibus suis, et conbusto palatio episcopatus
et omnibus domibus a latere secundo palacii comunis, contra ipsos superiores
inferiores se viriliter erexerunt et de platea comunis expelerunt, vulnerando,
capiendo et interficiendo predictos. Propter quod ipsi ante horam matutinam
in fugam conversi per pontem Levonem, quam aperuerunt, aufugerunt cum dicto
domno Torello et ad sua castra, scilicet Yrberiam, Sanctum Martinum, Castrum-Arianum
et ad multa alia, que habebant, se reduxerunt; et domnus Nicolaus de
Canossa factus fuit potestas Regine civitatis; et omnes illi de Sesso infra tres
vel quatuor dies cum omnibus amicis ipsorum redierunt in civitatem voluntate
et consensu dictorum intrinsecorum, scilicet domni prepositi, illorum de Canossa
et aliorum, parentelis et amiciciis nimium colligati.
Anno Domini millesimo CCXC. domnus Gerardus Guazonus, civis Cremone,
factus fuit potestas civitatis per dictos intrinsecos et intravit regimen in Kall.
Ian. Infra medium Ian. dicti intrinseci unanimiter et concorditer fecerunt domnum
marchionem Estensem suum potestatem usque ad tres annos; qui dictam
potestariam non aceptavit nisi per unum annum, retinendo alios duos in suo
arbitrio, et intravit dictam civitatem cum maxima multitudine militum, equitum
et peditum.
Eodem millesimo die . . . Febr. dictus domnus marchio dedit pro suo vicario
in rectorem domnum Bernardum de Rufis de Florencia, dicto domno Gerardo
Guazono cum toto suo salario et CC libr. ultra sibi donatis a comuni licenciato.
Die vero . . . dicti mensis dictus domnus marchio reduxit dictos extrinsecos in
civitatem et accepit fortilicias civitatis et castrorum de Razolo, Hyrberie et Albineti;
et post aliquos dies rediit Ferariam ducens secum quosdam de magnatibus
utriusque partis. Dictus domnus Bernardus fuit valens homo et bene se habuit
in ipso regimine; et fecit reparari turrim et palatia comunis, que combusta fuerant
in expulsione supradictorum, et campanam populi cum duabus aliis fecit poni
super ipsam turrim; et fecit fieri apud portam Sancti Petri magnam et pulcram
fortiliciam, in qua stabant custodes dicti domni marchionis; et stetit in ipso
regimine usque ad Kall. Iullii bene et legaliter faciendo; et tempore Aprilis
ordinata fuit gabella omnium rerum.
Eodem millesimo domnus Mundinus Pancaldus de Vicecomitibus de Pisis
factus fuit vicarius per ipsum domnum marchionem pro sex mensibus, scilicet a
Kall. Iullii usque ad Kall. Ian. Hic fuit partices et in ipso regimine non bene
se habuit; et fecit fieri arengheriam ad fenestras palacii veteris et destruxit illam,
que erat in platea comunis iusta dictum palacium; et propter sua opera fuit depositus
de suo regimine ante Kall. Ian. per X dies.
|
|