Super istum montem. eo descendente. supplicavit centurio pro filio paralitico.
Super istum montem venit ad eum multitudo languencium et qui
vexabantur a spiritibus immundis. et sanavit eos. Super istum montem
leprosum tetigit et mundavit eum. Super istum montem stetit in loco
campestri et turba discipulorum ejus cum eo.
De isto beatissimo monte videtur totum mare Galilee et Yturee et Traconitidis regionis usque Libanum. mons insuper Sanyr sive Seyr. sive
terra Sabulon et Neptalim usque Cedar et universa Zenereth usque Doctaym
et Bethuliam. et alia loca multa. Est autem locus longus. quantum jactus
est duorum arcuum: latus est. quantum est jactus lapidis et plus. amenus et
pulcher. habens herbam viridem et odoriferam. Ostenditur autem adhuc
lapis. super quo sedit Cristus ad predicandum. et sessiones apostolorum:
vocatur autem a Cristianis iste lapis tabula sive mensa Domini. quod super
illum lapidem benedixit Dominus quinque panes ordeaceos et duos pisces
et fregit et dedit discipulis. ut distribuerent in populo. Hanc mensam ego
vidi. tetigi et deosculatus fui et ibi oravi: gratias ago Dei omnipotenti.
In pede hujus montis juxta ad LX brachia. est unus fons pulcherrimus.
qui est circumdatus muro. ad quem fontem sepe veniebat Cristus
cum discipulis suis et ibi ad eum multitudo gencium plurium veniebat:
dulcis aqua est. Josephus autem appellat hunc fontem Capharnaum.
quia totus campus qui est ab isto fonte usque ad Jordanem per octo miliaria. appellatur Capharnaum. et quia civitas Capharnaum contra orientem
distat forte per tria miliaria. sed nunc est una villa satis bona. et pessima
gens in ea: in omnibus partibus Saracenorum non inveni pejores Saracenos.
quam in Nazareth et Capharnaum et Naym.
De isto fonte ad jactum lapidis supra mare Galilee. est locus. ubi Dominus
post resurrectionem stetit in litore cum suis discipulis piscantibus
et dixit eis: Numquid pulmentarium habetis?
De loco illo ad XXV brachia. est locus. ubi discipuli egressi de navi
viderunt prunas positas et piscem superpositum et panem.