Sequenti vero Ianuarii mense, qui fuit de M°C°LVIIII° anno
de indictione septima, precepit dominus imperator Placentinis,
quatenus ipsi omnes turres quascumque in eorum civitate
habebant a viginti brachiis supra destruerent atque omnia
eorum fossata, que pro ipsis ab eo defendendis isto animo
fecerunt, penitus explanarent ac deinceps in sua bona voluntate,
quamvis multum et in pluribus causis eum iam graviter
offenderant, omnibus tamen offensionibus remissis in pace
quieta de inde viverent. Placentini namque hoc audientes,
quamvis mestissimi, tamen fossata eorum explanare et turres
civitatis destruere ceperunt; sed fraudolenta tenti occasione,
ut ad id pervenirent, quod ex post facto apparuit, non perfecerunt.
Hoc eodemque mense imperator suos legatos ad Cremam
direxit et Cremensibus, quatenus muros et fossata castri
Creme de inde usque ad sanctam Mariam que dicitur Cirialis
destruerent, mandavit. Ipsi vero Cremenses hoc audientes
et hoc in maximum dedecus accipientes super illos legatos
fortiter irruerunt ac interficere voluerunt. Sed ipsi fugientes
atque se abscondentes vix evadere potuerunt; ac valde tristes ad
imperatorem redeuntes, que ipsis acciderant, renuntiaverunt.
|
1
5
10
15
20
|