XV.
Interea stante me ibi iuxta inferni claustra cum illam, que me capillo capitis
portabat, columbam non viderem et maximo tremore trepidarem, subito
respiciens sursum video avem quandam nimie magnitudinis atque pulchritudinis
desuper advenientem et monachum quendam veteranum pusille, ut michi videbatur,
stature ferentem sub remigio alarum suarum. Quodsi super illas ignivomas et
squalidas tenebras venisset, eum ab alto dimittens, in ipsis incendiis cadere permisit.
Quem maligni continuo spiritus circumdantes, se invicem ad eum percutiendum
cohortari ceperunt, cum repente eadem avis advolans, eumque de illorum manibus
eripiens, sursum revexit. Tunc michi ista cernenti beatus Petrus apostolus dixit:
"Expecta me in isto loco, ut vadam et illi servo Dei aperiam." Cumque ego cum
angelis relictus starem pavidus, unus ex illis Tartareis ministris horridus, hyspidus
aspectuque procerus, festinus adveniens, me impellere vel quomodocumque nocere
conabatur, cum ecce apostolus velocius accurrens meque subito arripiens, in quendam
locum gloriose proiecit visionis. At ego pavefactus cum me continuo mori
proclamarem, beatus Petrus apostolus dixit michi: "Ne timeas, quia modo non
morieris, verumtamen revertere prius et fac, quod debes facere, et sic postea venies
huc." Quid autem deberem facere, non innotuit.
XVI.
Vidi etiam quosdam viros nudos, in gutture, manibus pedibusque catenas habentes,
adeo ardentes et scintillas emittentes acsi ferrum, cum de fornace trahitur. In
catenis vero, que ad guttura eorum erant, masse ferree ardentes dependebant adeo
gravissime, ut numquam eis erigendi daretur facultas. Hos autem dixit apostolus
fures et rapaces fuisse.
XVII.
Stans ergo in ipso campo, vidi flumen magnum de inferno procedere, ardens atque
piceum. In cuius medio pons erat ferreus multam habens latitudinem; per quem
pontem iustorum anime tam facilius tamque velocius transeunt, quam immunes
inveniuntur a delictis. Peccatorum autem ponderibus gravati cum ad medium eius
venerint, tam efficitur subtilis, ut ad fili quantitatem eius latitudo videatur redigi.
Qua illi difficultate prepediti, in eundem flumen corruunt, rursumque assurgentes ac
denuo recidentes; tandiu ibidem cruciantur, donec in morem carnium excocti et
purgati liberam habeant transeundi pontis facultatem. Hoc autem insinuante
apostolo purgatorii nomen habere cognovi.
|
|