ut allium, sinapim, cepas, caseum, et vinum forte; et quandoque
post cibum penna missa in ore vomitum provocabis.
De emorroidis. — Emorroyde sunt vene quedam a capite usque
ad anum porrecte que multociens manant sanguinem; multociens
vero accidunt aut intus aut extra; cognoscuntur ut diximus in dissenteria.
Dicamus primum de ilis que fiunt extra et sanguinem ducunt,
de aliis dicturi. Facias eis fumigium de agallonibus, id est de
gallis querci (sic) que magne sunt cum colophonia et olibano positis
super carbones, et per embutum fumum recipiant; et si habuerint
magna capita, et fluxus non cesset, ligabis filo serico vel
filo facto de cortice laureole. Emplastrum ponere circa renes non
recuses de mastice, bolo, sanguine draconis, olibano, colofonia, distempera
cum aceto in quo bullierit armoniacum. Dieta eorum sit
de constrictivis, ut in fluxu ventris diximus; pulveres desiccativos
ponas super eas de mumia, de sanguine draconis, mastico, olibano,
bolo, balaustia, cortice maligranati et similibus. Si tali modo sanguis
non cessaverit, de omnibus istis constrictivis in multa quantitate
quasi emplastrum facias et in anum desuper teneas. Spongiam
combustam etiam superspargas et de filtro combusto vel carta de
bombace facta combusta pulverizata et supersparsa multum juvat.
Pulvis sarcocolle multum confert. Prius fomentum facias eis de malva,
pulegio, calamento; deinde quidem si fuerit sine fluxu quasi
mamille et tumida et dolorem inferat, ponas sanguisugas et liberabuntur.
Quando autem ab interioribus est fluxus, ita succurras:
radicis tapsie corticem tere et cum oleo laurino commisce et magdalionem
informatum intromitte. Item cotulam fetidam in vino diu
coquas et postea cum sagimine teras et factis magdalionibus intromittas.
Pulvis enim iste valet istis et extrinsecis: corticem radicis
tapsie et aristologie rotunde cum semine tere et in pulverem redige
et patientibus locis supersparge; omnes alii pulveres desiccativi
circa inferiora sunt necessaria (sic). Nota siquidem istam esse fortissimam
passionem que sepissime multo veniente sanguine aut
omnino cessante vel subitam mortem infert vel in ydropisim aut
ptisim transeunt.
De exitu ani. — Quandoque ex debilitate emorroidarum vel
crossa fumositate anus exteriora petit. Statim in principio cause
fomentum facias eis de mirto et cortice maligranati, cortice vivi
et simphito, et post fomentum pulverem de foliis mirti factum super
eum spargas. Mulieres nostre laborantibus ista passione calendulam
coctam tribuunt ad comedendum more caulium et liberantur.
Aliquando pro fluxu ventris et nimio conamine emorroide
fluunt; dabis eis ad confortationem stomaci diacusim electuarium,
huic cause necessarium, quod in Antidotario reperitur ut dicta Ypocratis
serventur, si non una relicta fuerit, periculum ydropem
fieri aut ptisim. Omnibus curatis cufas singulis mensibus renibus
imponito, ut melancolicus sanguis qui purgari solebat cufis
attrahatur.
|
|