possint. Erit in adiutorium eius alia bestia que ascendet de terra et habebit duo
cornua similia agni, que sectam pseudoprophetarum, prout Iohannes inferius
ostendit, significat. Sicut enim Iamnes et Mambres faciebant signa coram Pharaone,
et Symon magus coram Nerone, ita et isti facient coram bestia, que
ascendet de abysso, hoc est de gentium natione, quod etiam apostolus bis uel
ter commemorat.
Postquam vero sanctus Iohannes bestie prime mentionem fecit, que quarto
maxime tempore partem populi christiani absorbuit, necessitate compulsus
ostendit ea, que bestia hec factura est tempore sexto, ab hiis, que de virginibus
loqui cepit, digressionem faciens, ut se de hiis, que ad bestiam pertinent, continuatim
expediret. Nunc autem redit ad ea, que pretermiserat, et numerum
virginum colligit centum quadraginta quatuor milia, de quibus et dicit: Hii sunt,
qui cum mulieribus non sunt coinquinati, virgines enim sunt. Numerus iste
tantus est, quantus et numerus martyrum, qui de duodecim patriarchis est assumptus,
ut tot in illa civitate sint virgines signati quot martyres, preter turbam
maximam, quam dinumerare nemo poterat. De quibus sermo grandis et loco
presenti ad discutiendum difficilis.
Primo itaque loco prelium accipiendum est Christi, qui raptus est ad deum
et ad thronum eius, secundo de Michaele et angelis eius, quod prelium
denuntiat martyrum, tertio de persecutione diaboli, qua persecutus est ecclesiam
tempore Arrianorum, qui doctrinam erroneam post mulierem ac si aquam fluminis
misit. Ex cuius occasione persecutionis factum est, ut plurimi assumptis
alis in solitudinem fugerent. Quod licet et aliis temporibus factum sit, precipue
tamen quarto tempore claruit. Quinto loco introducitur angelus quidam, qui
iudicium domini appropinquare denuntiat. Vidi, ait, alterum angelum volantem
per medium celum, habentem evangelium eternum, ut evangelizaret sedentibus
super terram et super omnem gentem et tribum et linguam et populum, dicens
magna voce: Timete dominum et date illi honorem, quia venit hora iudicii
eius. Deinde duo alii angeli sexto loco accipiendi sunt, de quibus dicitur: Et
|
|