Subruit urbes atque palacia,
Christianorum non vult solatia.
Subvertit regna, curvat imperia,
Culmine lapsos replet miseria.
Exemplo nobis est Babylonia,
Moenia cuius servant demonia.
Et rex illius effectus bestia
Nos saciari docet modestia.
Qui delectatur quidem superfluis,
Ad instar regis erit cum bestiis .
Qui se castigat damnis alterius,
Huic dicetur: Scande superius.
Ad deum nostrum sint nostri oculi,
Ab ipso datur potestas populi;
Si potestati resistunt aliqui,
Deo videntur esse contrarii.
Eradicantur de loco penitus,
Quos repentinus vorat interitus.
Non remanebit horum posteritas;
Haec est vindicta, quam facit veritas.
Cui de factis redditur racio,
Per cuius manum fìt ordinatio
Regnorum, regum et magistratuum,
Orbis terrarum et potentatuum,
Huic agamus sedulo gracias,
Cesari nostro quo det pancracias
Atque triumphum iugis victorię,
Qui est rex regum et deus glorię.
|
|