Salimbene de Adam: Cronica

Pag 733


in palatio communis Bononie, et dilaceraverunt eum membratim
et de palatio proiecerunt tamquam vile cadaver. Tunc temporis
potestas Bononie erat dominus Guillielmus Putagius de Parma,
et frater Ghifredus de Paganis de Parma guardianus erat fratrum
Minorum de Bononia.
Quod hoc anno apparuerunt miracula truffatoria cuiusdam Alberti qui morabatur
Cremone et erat portitor vini sive brentator.

Item eodem millesimo apparuerunt miracula truffatoria cuiusdam
Alberti qui stabat Cremone et fuerat unus vini portator
simul et potator nec non et peccator. Post cuius mortem, prout
dicebatur, Deus multa fecit miracula in Cremona, Parma et
Regio. In Regio ad ecclesiam Sancti Georgii et Beati Iohannis
Baptiste. In Parma in ecclesia Sancti Petri, que est iuxta Novam
plateam. Ubi congregabantur omnes brentatores, id est portitores
vini, civitatis Parme; et beatus ille qui poterat eos tangere
vel de suo aliquid dare. Idem faciebant mulieres. Et faciebant
societates per vicinias et egrediebantur ad vicos et plateas, ut
pariter congregati processionaliter venirent ad ecclesiam Sancti
Petri, ubi istius Alberti reliquie habebantur. Et portabant cruces
et vexilla et cantando ibant, et donabant purpuras, xamitos et
baldakinos et denarios multos. Et postea omnia ista brentatores
adinvicem inter se dividebant et habebant sibi. Quod videntes
sacerdotes parrochiales procurabant ut iste Albertus in eorum
ecclesiis pingeretur, ut melius oblationes a populo obtinerent. Et
non solum in ecclesiis tempore illo fiebat eius ymago, sed etiam in
multis muris et porticibus civitatum atque villarum seu castrorum.
Quod contra statuta Ecclesie expresse cognoscitur esse, quia
reliquie alicuius in reverentia haberi non debent, nisi prius a
Romana Ecclesia aprobentur et sanctorum cathalogo ascribantur,
nec etiam alicuius ymago ad modum sancti alicubi debet depingi,
nisi prius ab Ecclesia eius canoniçatio divulgetur. Quocirca episcopi,
qui tales abusiones fieri permittunt in suo districtu sive
in sua diocesi, digni essent ab episcopio removeri, id est dignum

Torna all'inizio