: Chronicon Marchiae Tarvisinae et Lombardiae

Pag 16


DE OBSIDIONE FAVENCIE ET EIUS CAPTIONE. - Anno Domini 1241 post longam obsidionem
cepit Faventiam imperator. In eadem estate Pisani ceperunt duos cardinales et multos prelatos,
qui per mare Tirenum in navibus Ianuensium pergebant Romam ad summum pontificem.
Non multo tempore post obiit papa Gregorius nonus et vacavit sedes apostolica multis
diebus. Tandem papa Celestinus, mediolanensis natione, fuit electus, qui post electionem
vix decem et octo vixit diebus.
Circa istud tempus effera gens Tartarorum gladio, incendiis et rapinis totam Ungariam devastavit.
Et tunc rex Bela vix eorum manus evasit, fugiens ad maritima Sclavonie festinanter.
DE ELECTIONE PAPE INN0CENTII ET SUPERBIA IMPERATORIS. - Anno Domini 1242 cardinales
post multa consilia elegerunt domnum Sinibaldum, cardinalem de comitibus Lananie
natione ianuensem, qui appellatus est Innocentius quartus. Iste quesivit fere duobus annis
habere pacem cum imperatore, volens finem imponere tantis malis. Sed imperator cum fere
totam Italiam possedisset, in superbiam elevatus, verba quidem blanda dicebat, sed romanam
Ecclesiam deprimere modis omnibus satagebat. Superbie quippe spiritu inflammatus, proponebat
ecclesiis auferre iurisdictiones et possessiones villarum et castrorum, quibus erant ab
imperio perdotate, et taliter volebat humiliare superbiam clericorum. Et licet ipse versipellis
esset plurimum et astutus, tamen quod ex abundantia cordis os loquitur, istam sacrilegam
voluntatem non potuit occultare. Unde contra se odium prelatorum in toto imperio non modicum
excitavit.
Hoc anno in mense marcio populosa Montagnana est divino iudicio concremata. Quod
audiens Ecelinus, ipsam festinanter in manu valida occupavit.
DE DESTRUCTIONE CASTRI SANCTI BONIFACII. - Anno Domini 1243 Galvano Lancea,
vicario in Marchia existente, castrum Sancti Bonifacii a Veronensibus est destructum. Sub
eodem tempore etiam comes de Panigo civis veronensis est Padue decollatus, multique viri
nobiles et prelati accusati de proditione, Verone sunt ab Ecelino diversis tormentorum generibus
interfecti. Et tunc primo tyrannus assumpsit maiorem audaciam ita nobiles et potentes
sicut ignobiles et pauperes puniendi.

1



5




10




15




20




25

Torna all'inizio