14. Bonus odor. In lege, qui hostias bono voto
offerebat, bonus odor Deo erat et acceptabilis, ita et
praedicationis piae vir [ al ., virtus], doctrinae odorem
praestat fragrantem Deo.
15. AUGUST. ( lib. sent. Prosp ., c. 35, tom. III).
Christi bonus odor . Bonus Christi odor est, praedicatio
veritatis; quem odorem in vitam capit qui Evangelio
bonis moribus servit et congruit. Mortem incurrit,
cujus ab his quae bene loquitur, vita dissentit,
quae conditio etiam auditores obstringit cum
recta praedicatio ab aliis per incredulitatem auditur
in mortem, ab aliis per fidem suscipitur in
salutem.
16. LANFR. Bonus odor . Praedicatio quidem bona
est in utrisque, sed qui inobedientes sunt, illis sit
praedicatio odor mortis, id est, peccati, in mortem
aeternam.
17. AMBROS. Aliis odor mortis . Incredulis praedicatio
Christi odor mortis est. Audientes enim verbum
Dei, sic accipiunt quasi pestem, ex qua oritur
mors.
18. Adulterantes , id est, pseudoapostolos tangit,
qui verba Dei per malam interpretationem adulterabant.
Nam tollentes divinum sensum, humanum
ponebant.
19. LANFR. Adulterantes . Adulter non quaerit prolem,
sed voluntatem corporis explere. Tales sunt
qui pro terreno commodo verbum Dei praedicant,
non quaerentes filios spirituales generare.
20. Ex Deo . Ex Deo, inquit, loquimur, quia ex
Deo accipimus, quod praedicamus.
AMBROS. Ex Deo , id est, quomodo Deus dedit
21. LANFR. Coram Deo . Quia illi placere
contendimus.
CAP. III.—1. LANFR. Incipimus iterum , etc.
Non nos, inquit, commendamus, nulla enim commendatione
indigemus, quia nec illa quae fit vobis,
nec quae fit litteris, quia per epistolam (a pari).
|
|