Pag 33

venam aquae nulla arte, nullo ingenio reperire poterant. Cumque iam longo labore fatigati
de aquae inventione desperantes inani opere vellent deficere, coeperunt se adhortari dicentes
ad invicem: Instantia orationum et eleemosynarum largitione deprecemur unanimiter
Dominum, ut meritis sanctissimi praesulis Anselmi nobis concedat aquam reperire, pro qua
invenienda diu frustra insudavimus. Facientibus itaque illis eleemosynarum charitatem pauperibus,
subito advenit puer nuntians in puteo abundantiam aquae repertam.
74. In literis archidiaconi Tarvisinae ecclesiae domnae Matildae directis et nuntii relatione,
qui eas detulit, haec res mihi pariter et multis aliis innotuit. Erat vir quidam Lanzo
Iudex nomine, Mediolanensis genere, Tarvisinus habitatione, qui, ficus agritudine vehementer
virente et guttae morbo graviter eum in pedibus ferente, et gressu fuerat privatus, et
requies somni penitus sibi nulla dabatur. Et quia viribus iam deficientibus in lecto vix se
revolvere valebat, funiculus supra lectum fuerat ligatus, cuius adiutorio se mutabat in quodlibet
latus. Die igitur quadam, tractis suspiriis et profusis lacrymis, coepit orare his verbis:
Deus meritis sancti Anselmi, cuius audio admirabilem gloriam, ostende in me etiam tuae virtutis
Clementiam. Sancte confessor, memento familiaritatis, quae nos in scholis socios iunxerat,
prosint mihi, piissime praesul, quod persaepe miscui tecum amicitiae verba; ad venerandum
tuum tumulum veniam, si praestas sanitatis laetitiam. Tota itaque proxima nocte, sopore
somni arreptus, quievit usque in crastinum. Facto autem mane, sentiens se iam convalescere,
mox incepit confidenter ire, sicque sancti praesulis misericordia liberatus nunc gaudet
se optime sospitatum.
75. Praeterea adolescens quidam auditus et linguae officio a nativitate privatus fuerat,
qui plus mensibus duobus nobiscum demorans suae firmitatis certam nobis et multis aliis
dederat notitiam. Hic quater in somnis vidit sibi roganti sanctum pontificem et aures iuxta
sanctum tumulum sibi aperiri, et vinculum linguae pariter dissolvi. Veniens igitur, ut
fuerat praemonitus, ad sanctum corpus mugiens et pectus tundens pro viribus, sanctissimi
praesulis devote poscebat praesidium. Aliquot itaque diebus insistens orationibus et auditus
consecutus est laetitiam et distincte loquendi plenam efficaciam; quod praesentes vidimus
et fere cunctus populus nostrae urbis.
76. Praeterea mulier quaedam fuit longo tempore luce privata, quam accedente gutta
ad tempus tantus dolor capitis vexabat, ut furiosa prae angustia propria roderet membra.
Haec utique hortatu et adiutorio Opizonis de Gonzaga ad sancti confessoris deducta tumulum,
et guttae liberatur angustia, et lucis pariter consecuta est laetitiam. Cuius praeteritae
infirmitatis praedictus Opizo adest testis, qui corporis alimenta ex pietate diu sibi praebuit
in domo sua.
In praedio canonicorum Beati Petri, in loco cui nomen est villa sancti Laurentii, mulier
fuerat quaedam, cui nasus horribiliter intumuerat, et calor intrinsecus urens saniem emittebat.
Haec devote sanctum deposcens praesulem consecuta est desideratam salutem.
77. Item quidam puer de Saviala gaudio lucis privatus fuerat, qui rediens a Cremona
ad sancti praesulis festinabat tumbam, a qua paucis diebus discesserat. Properans
itaque sitienter ad sancti remeare corpus ad lapillos saepissime allidebat pedes utpote
homo qui sibi adversa nullatenus prospicere valebat. Dolens ergo et gemens sanctum confessorem
poscebat suppliciter, ut calamitatem tantam dignaretur aspicere. Taliter igitur
oranti in via, dum veniebat, occurrit desideratae lucis medela.
Pariter quidam de episcopatu Tarvisino lumina ad proprium usum laxare nequibat.
Hic quoque veniens ad venerandam tumulum recepit optatae lucis gaudium.
78. Puella quaedam pariter fuerat in villa, cui vulgaris usus indidit nomen Mairana,
a civitate Brixia non multum remota. Huic et linguae usus interclusus fuerat et aliquot
membrorum praeter manum dextram suo officio fungi nequibat. Hanc miserabilis mater
seminecem spectans devota devovit, se eam delaturam ad sanctissimi confessoris misericordiam,
quasi altera Cananaea pro filia rogatura. Iuxta igitur sui voti promissionem, parentibus
eam deferentibus, puella in via et linguae recepit officium et omnium membrorum