fuerunt in dicto bello, scilicet dominus Nicholaus de Baçaleriis,
Henrigucius de Gallutiis de Bononia, et alii inter milites et pedites
bene tria milia CCCXXV de Bononia. Item de Regio mortui
fuerunt dominus Iohannes Roxellus de Robertis, capitaneus tunc
militum Reginorum, et dominus. Princivallus de Menoço et Guido
Briga, filius condam domini Bernardi Conradi. Et portati fuerunt
Regium, quilibet in una capsa. Et primi duo, scilicet dominus
Iohannes Roxellus et dominus Princivallus, sepulti fuerunt simul
ad locum fratrum Predicatorum, quilibet in sua sepultura. Et
positi fuerunt in bara, quilibet in sua, ad ecclesiam Sancti Barnabe
extra portam Sancti Petri; et tota civitas exivit extra civitatem
obviam; et hoc fuit die Sabbati XVa Iunii. Guido vero Briga postea
ductus fuit per plures dies in una alia capsa, qui mortuus erat
per plures dies, et sepultus fuit ad ecclesiam fratrum Minorum.
Item mortuus fuit Nicholaus condam domini Philippi Episcopi,
qui erat iudex cum potestate Bononie in dicto exercitu, nec potuit
inveniri in dicto campo. Facta fuit hec victoria ex parte Faventinorum
et strages ex parte Bononiensium in festo beati Antonii
ex Ordine Minorum. Et ideo Bononienses nolunt ipsum audire
in Bononia nominari. In vigilia etiam beati Francisci, in precedenti
millesimo, tedio affecti, Bononienses ab obsidione Faventie
recesserunt. Et ita per beatum Franciscum vitaverunt mala et
per beatum Antonium adepti sunt bona.
De magna inundatione aquarum et de diluvio et de nivibus et de mortalitate
bestiarum, propter victualium caristiam que isto anno fuit.
Item eodem anno, scilicet MCCLXXV, incepit pluvia venire
in temporalibus nundinarum sancti Mauricii, et ante Nativitatem
Domini venit diluvium maximum aquarum et duravit per
plures dies. Et inundationes aquarum magne fuerunt, et flumina
sparserunt et exiverunt de locis suis et sparserunt per episcopatum
Reginum; et hyems tota fuit pluviosa; et eo anno et sequenti
fuerunt pluvie et diluvia magna in planitie. Et eodem anno in
montanis partibus fuerunt nives magne ultra modum, et fuerunt
|
|