Ad hoc monasterium monachorum nigrorum Sancte Crucis de Cypro
accessi recedens de Nicosia. et perveni illuc cum devocione et
reverencia et vidi et tetigi lignum illud benedictum. quod ab omnibus in
reverentia habetur. et navigantes mare in tempestatibus maris invocant
crucem benedictam de Cypro.
Die Veneris de sero in vigilia Beate Marie Magdalene. unam navem
ascendi. que dicitur criparia. et de Famagosta recessi usque terram
sanctam et in festo beati Jacobi pervenimus. omissa provincia Cypri.
et illa die sero recessimus. transire volentes brachium maris. et. dum pervenissemus prope terram sanctam. ventus validus nos invasit. qui nequiter
duxit nos usque Cesaream castrum. quod antiquitus vocabatur Antipatrida
ab Antipatre. patre Herodis. et nunc dicitur Arsuff. et est super
mare et est destructum: fuit fratrum Hospitalis Sancti Johannis. Et.
sicut Deo placuit. penultima die mensis Julii dominico. misit nobis
Deus gratiam suam. et. prospero vento flante. pervenimus ad portum Jaffe
seu Joppe. quod Jaffa nunc dicitur. et tota nocte stetimus extra portum.
sed. die lune adveniente. super terram sanctam descendimus de licentia
Sarracenorum. quam prostratus et oculis plenis lacrimis plusquam XX
vicibus deosculatus fui et omnes alii peregrini similiter: de Jaffa autem
usque Famagostam sunt trecenta quinquaginta miliaria.
Ista Jaffa dicta est antiquitus Joppe. posita in uno angulo maris. ab uno
latere castrum. que Arsuff. distans a Joppe per Viij miliaria et est
usque Cesaream. que distat a Joppe per XXV miliaria. et est super mare: ab
alio latere est castrum Beroardi. quod distat a Joppe per X miliaria. et est
super mare. Joppe autem fuit nobilissima civitas super collem situata.