Sit discreta, rex o bone, manus inpositio,
Ne fortasse labem trahas ex tyronis vicio;
Vita prius requiratur, mores et conditio.
Ne accipias pro agno barbatum cornigerum
Nec pro Iovis ave summas nocturnum aligerum
Nec constituas Priapum in numero syderum.
Qui pro Socrate salutat Dyogenem Cynicum
Et qui lolium extollit despiciens triticum,
Ipse utitur Martino postponens dominicum.
Deum lauda, rex HEINRICE, qui tibi discernere
Prestitit omne, quod exit ab utroque genere;
Ipse tibi Philisteos concedit prosternere.
Quapropter semel in die relictis inanibus
Ante vultum redemptoris elevatis manibus
Te presenta suspirando cum devotis planctibus.
|
|