5. Arbitrans quia . Utrumque credidit Abraham,
et quia in Isaac semen habiturus esse, et placere
Deo si ei ipsum Isaac immolaret; credidit enim quoniam
mortuum Deus resuscitaret.
6. In parabolam . Aries qui inter vepres haerens
cornibus repertus est, et Isaac unum Christum hominem
et Deum significant. Per hoc igitur quod aries
quidem est immolatus, Isaac vero morte subtractus,
significatum est Christum secundum carnem passurum,
secundum vero divinitatem, mortis discrimen
non esse sensurum. Et hoc quod ait: in parabolam,
id est allegoriam eum accepit. Ipsum enim prius
ad moriendum dedit, sed post experimentum fidei
reperto ariete ad videndum recepit. Hoc sibi propter
fidem et obedientiam honore collato, ut per filii
vitam, divinitatis significaretur a morte subtractio.
7. Fastigium virgae . Vel sceptrum ferebat Joseph
more secundi a rege. Vel fastigium virgae dicit altitudinem
regiminis ejus, quam altitudinem Jacob
adoravit, id est in summa veneratione habuit. Et
hoc fide, quia a Deo factum esse credidit.
8. Jephte, David . Non ex eo ducitur Jephte in testimonium
quod filiam occiderit, sed quod per fidem,
adjuvante eum Deo, hostes superaverit.
9. Acceperunt mulieres . Ordo: Mulieres acceperunt,
scilicet a sanctis Dei mortuos suos de resurrectione,
id est, resurgentes, ut ab Elia unicum
|
|