Cap. XLIII.
Capitulum Capuanensium regratiatur magistro
Petro de Vineis, quod aliquid petit ab eis, et
recommendat se sibi.
Utinam in magnis a nobis gratiam sentiretis,
quam in minimis ex innata vobis
benevolentia memoratis. Bonarum
quippe mentium est, non quid fiat,
sed quo animo fiat attendere, et obsequentium
debitum gratiam reputare. O quantum
debet vobis Ecclesia; o quantum vobis civitas
Capuana tenetur; quia non a civitate vel
provincia laudem, sed civitati et provinciae
laudis titulum acquisistis; ut jam non Petrus
a Capua, sed a Petro Capua latius agnoscatur.
Felix radix quae fructiferum protulit
palmitem, felix vinea quae vinum praecipuum
germinavit. Grates ergo vobis referimus,
quod a nobis requiritis gratiam; et quod mandastis,
implevimus gratiose rogantes ut Ecclesiae,
matris vestrae, non sitis immemores.
Cujus vos in sacramentis ecclesiasticis ubera
lactaverunt.
Cap. XLIV.
Magister Petrus de Vineis cum magnis praeconiis
extollit nomen Imperatoris.
Quaestionis arduae petita responsio, in
quantum respondenti permittitur, enodatur.