Regina parentele facte et iurate fuerunt inter illos de Foliano et
dominum Antonium de Robertis et inter dominum Iacobinum de
Rodilia et dominum Guidonem de Tripolis et dominum Guidonem
de Bibianello et dominum Guilielmum de Canusio in mense Aprilis.
Et postmodum in mense Aprilis vel Maii illi de Besmantua redierunt
super petram Besmantue. Et certa quantitas militum et
peditum de Bononia et de Parma et cum balesteriis de Mutina
ivit circum Besmantuam, et steterunt ibi per XV dies. Et per
concordiam illi de Besmantua dimiserunt terram communi Regino
et recesserunt.
Millesimo supraposito, duo reges cum exercitibus suis preliati
sunt simul et habuerunt durissimum bellum, scilicet Rodulfus
rex Romanorum, qui de voluntate pape Gregorii decimi ad imperium
habendum erat electus, et rex Boemie. Congressi sunt igitur
simul, et rex Rodulfus victoriam habuit et regem Boemie interfecit;
quorum quilibet magnus amicus erat Ordinis fratrum
Minorum.
De maximo terremotu qui multas urbes destruxit et castra.
Eodem anno, in festo apostolorum Philippi et Iacobi, id est
in Kalendis Maii, sub papa Nicholao tertio, factus est terremotus
adeo magnus in Marchia Anconitana, quod due partes Camerini
submerse sunt, et multi homines utriusque sexus perierunt. Fabrianum,
Matelica, Callium, Sanctum Severinum et Cingulum,
omnia ista castra sunt dirupta. Similiter Nuceria et Fulignum
et Spellum. Et breviter omnia illa castra que sunt in illis partibus
montanis multa sunt damna perpessa. Item tres montes,
inter quos duo lacus et castrum erant artificiose constructi, adinvicem
sunt coniuncti et pariter comminuti; et lacus et fluvius,
ex cuius redundatione fiebant lacus, omnino absorti sunt. Item
unum castrum omnino absortum est. In Romagnola et in montibus
qui sunt inter Florentiam et Bononiam, castra et edificia
multa sunt dirupta et multi homines utriusque sexus suffocati
sunt. Tantus enim timor invasit omnes in illis partibus, quod
|
|