«Quia de vobis tamquam de specialibus amicis confidimus,
vestrum auxilium confidentius imploramus cum nobis ipsum
fuerit oportunum. Quocirca.»
«Cum a sanctis iubeatur scripturis et approbata consuetudine
approbetur fidem in cunctis promissam inviolabiliter
observari, de vestra possumus non modicum prudentia
mirari quomodo fidem datam tam turpiter violastis anime
periculum incurrere non verentes. Quapropter.»
«Cumque fides in cunctis promissa sancta precipiente
scriptura et in usu approbante debeat inviolabiliter observari,
de vobis quam plurimum admiramur qua de causa fidem
inter nos exhibitam violastis.»
16 Consules sic possunt exordiri quando scribunt alicui baronum:
«Quia de vestra nobilitate et amicitia dominabili plurimum
confidimus, vos in nostris negotiis confidentius compellamus
credentes vos nobis vestris amicis vestrum auxilium
collaturum. Quocirca.»
«Quanta cordis affectione et animi sinceritate vestris serviverimus
predecessoribus et vobis etiam in hiis, que valuimus
servire a vestra non credimus excidisse memoria quia
quotiens nos ad vestrum servitium appellastis et honorem
secundum nostrum posse nullatenus tardavimus venire.
Quapropter.»
«De vestre nobilitatis sinceritate de qua fiduciam gerimus
indubitatam plurimum confidentes auxilium vestrum confidentius
imploramus, in hiis precipue que ad vestrum vel ad
nostrum spectent proficuum et honorem. Quapropter.»
«Quoniam inter nos et vos fidelis societas fuit, et semper
dilectio viguit pura, cum magna fiducia auxilium a
vestra dominabili amicitia imploramus cum ipso aliquo
modo indigere videmur. Cuius rei causa.»
|
|