CAP. IIII.
Semper gratias agamus factori corde tenus,
Qui nos humiles plasmavit, non duros ut hebenus,
Ne vecordes pereamus crudus ut Achemenus.
Ergo simus non ut equi sine intellectibus;
Mundo corde presentemur supernis conspectibus
Et ad nuptias intremus niveis cum vestibus.
Recolamus, quia deus, qui caret initio,
Totum mundum fabricavit ad votum de nichilo;
Angelos sursum locavit, inmunes a vicio.
In his unus appellatus virtutis signaculum
Maluit in aquilone ponere pinnaculum;
Cum complicibus mox ruit ad Plutonis stabulum.