XVIII.
DICTIONES CELERES
DE COMMUTATIONE DICTIONUM CELERIUM
ET TARDARUM
Ad urbanitatem bene loquendi spectat dictiones
celeritatis impetum facientes interpositione longarum
invicem retardare, ut si dicas: Invidus nimium carpitur,
aliena felicitate contabescens ; et tu misce tardas
et celeres dictiones, sic dicens: Invidus aliena carpitur
felicitate, nimium contabescens .
XIX.
DE LONGANDIS CURTIS ET CURTANDIS LONGIS
Si vero dictio nimis curta venerit in dictamen, per
compositionis elongabitur incrementum et, si qua nimis
longa inveniri contigerit, per substractionem compositionis
vel per sincopam merebitur mutilari, dummodo
sententia non ledatur nec usui contradicat; ut si pro
hac dictione potiri dixeris perpotiri , vel pro exaudivistis
dicere volueris exaudistis .
|
|