Eidem electo respondet idem S. camerarius.
Cum operis perquam laudati vocalis oblatio conversa fuerit offerentis
manuali munificentia in realem, et recipientis oculus mentis et corporis auctoris
semitas intentionis incognitas, caligando saltem, inspexerit, temptata
rudis paupertas ingenii ad conditiones appositas respondebit, ignara presertim
de operis invisi, licet fecunde vene, sublimibus evecti preconiis disserere
qualitates. Mira tamen res apud me geritur, ut is de census inopia conqueratur,
cuius inexhaustis referta gazis eraria superstagnant, et difficultatem
ad operis scribendi copiam nanciscendam de scribarum oportunitate
pretendat, cuius votis anxiis tota quasi plena scribis et phariseis curia
Romana, quam incolit, ad membranam et calamum voracibus se hyatibus
nedum ingerens, sed invitans, habunde poterit – nisi forsan congesti census
cumuli plenitudo, que minui respuit, vitio contradicat avaritie – subvenire.
|
|