Pag 95

passionem suam futuram post biduum. Quarta feria principes sacerdotum et seniores
populi consilium fecerunt in atrio Cayphe, ut Iesum dolo caperent et occiderent; et pactus est
Iudas cum eis de traditione Iesu pro XXX argenteis. Quinta feria premisit discipulos in
civitatem, ut pararent pascha, et predixit eis hospitem et hospitium, scilicet cenaculum
grande stratum. Vespere facto venit Iesus et discubuit cum XII; consurgens a cena lavit pedes
discipulorum, dicens renitenti: “Si non lavero te, non habebis partem mecum”, et dicens omnibus:
“Exemplum dedi vobis, ut, quemadmodum ego facio, ita et v[os] faciatis”; et turbatus
spiritu dixit, quod unus ex eis traderet eum. Et tristantibus addidit: “Qui intingit mecum
manum in catino, hic me tradet”. Et expressit Iohanni supra pectus recumbenti submissa voce,
quis esset, scilicet cui panem intinctum porrigeret, et porrexit Iude buccellam intinctam, et introivit
in illum Sathanas, et dixit Iudas: “Numquid ego sum, rabbi?” Et exivit continuo. Et accepit Iesus
panem, benedixit et dedit discipulis suis dicens: “Hoc est corpus meum”. Similiter et de calice:
“Hic est sanguis meus; hoc facite in meam conmemorationem”. Tunc predixit illis, quod scandalum
paterentur, et quod Petrus negaret eum. Et subdidit longum sermonem consolatorium, scilicet:
“Non turbetur cor vestrum” et multa alia. Quibus dictis oravit pro se, pro discipulis et
pro his qui credituri erant. Tunc venit in villam Gethsemani, que est ad radicem montis Oliveti, et
intravit in ortum et oravit; et tristatus ait: “Tristis est anima mea”. Et rursus oravit, ut pater
transferret calicem ab eo, et redarguit discipulos dormientes, et factus est sudor eius ut guttae
sanguinis. Et ait discipulis: “Dormite”, et post: “Surgite, eamus hinc”. Adhuc eo loquente Iudas
advenit, qui osculo tradidit eum ministris; qui prius ceciderunt, sed postea ligaverunt eum. Petrus
autem amputavit auriculam Malcho. Iesus sanavit eum et ait Petro: “Mitte gladium tuum in vaginam”.
Ad turbas autem dixit: “Tamquam ad latronem existis cum gladiis et fustibus con[prehendere] me”.
Tunc discipuli fugerunt eo relicto. Ministri duxerunt eum ad Annam. Adolescens quidam sequebatur
eum, amictus syndone super nudo; quem tenuerunt, sed relicta syndone nudus profugit ab eis.
Hunc quidam aiunt fuisse Petrum, alii Iacobum, alii Iohannem. Petrus autem sequebatur a longe,
sed Iohannes, qui erat notus principi, duxit eum in atrium, ubi calefaciens se ad vocem ancillae
negavit Dominum. Pontifex autem interrogabat Iesum de doctrina eius. Et cum dixisset: “Interroga
eos qui audierunt”, unus ministrorum dedit ei alapam. Et misit eum ligatum Annas ad Caypham.
Cum autem Petrus ter negasset Dominum, Dominus respexit eum, et ille flevit. Mane facto
ferie VI. falsi testes accusaverunt eum de reedificatione templi, et adiuravit eum Cayphas,
si esset filius Dei benedicti. Et cum dixisset: “Videbitis filium hominis s[edentem] a d[extris]
v[irtutis] Dei e[t] v[enientem] in n[ubibus] celi”, princeps sacerdotum scidit vestimenta sua, et exspuerunt
in faciem suam, et velantes faciem colaphis ceciderunt et palmas dederunt et adduxerunt eum
vinctum in pretorium. Tunc Iudas penitentia ductus retulit argenteos principibus sacerdotum et
laqueo se suspendit. De argenteis emptus est ager, qui dictus est Acheldemach, id est sanguinis,
in usum mortuorum, scilicet in sepulturam peregrinorum. Exivit Pilatus pretorium ad Iudeos, querens,
quam accusationem haberent adversus eum; qui dixerunt: “Quia dicit se regem et conmovet
populum a Galylea usque huc”. Et misit eum Pilatus ad Herodem. Herodes autem illudens
induit eum alba veste et remisit ad Pilatum. Qui sedit pro tribunali in loco qui dicitur Licostratus
Grece, Gabbatha vero Hebraice. Consueverat autem preses unum absolvere de compeditis
in die festo, et habebat Barraban, qui erat latro. Licet ergo sciret Pilatus, quod per invidiam
tradidissent eum, et licet diceret: “Nullam causam invenio in eo”, et uxor eius: “Nil tibi et iusto
illi”, tamen clamantibus Iudeis: “Crucifige eum, quia, si dimittis eum, non es amicus Cesaris”,
flagellatum tradidit illis eum, ut crucifigeretur. Milites presidis illudentes ei circumdederunt eum