Balaham hec deludendo fecit haretalogum;
Ideoque cum prophetis non habet katalogum,
Miser ille cum asella formavit dialogum.
In Hyerichontinę urbis ruina notissima
Achar ista conturbavit ex lamna purissima,
Morti tradidit, ut esset omnium perhypsima.
Cum apostolis certavit haec deceptrix gentium:
Iudam loculos portantem traxit ad suspendium,
Dedit ei sempiternum sulphuris incendium.
Haec minores et maiores temptat milleformiter
Cui non consentientes resistamus fortiter,
Contra pugnam deceptricis eamus concorditer.
Cur debemus, fratres mei, huic monstro credere,
Quę non cessat nos et nostra cottidie ledere,
Donec trudat in gehennam durantes in scelere?
Nichil tulimus in mundum, nichil reportabimus,
Nisi forte quod largimur pietatis manibus;
Non seducat hec seductrix nos verbis inanibus.
Nudi nascimur et nudi in terram regredimur -
Preter victum et vestitum quid in mundo quęrimus?
Nil hic proprium habemus, peregrini venimus.
|
|