De cultu post diluvium (507-9).
1. Sem studuit colere verum Deum…. Hic secundo anno post
diluvium genuit Arfaxat qui eciam genuit Elam, a quo nobilis
generacio Alanorum in oriente dicitur exorta; et est hodie
maior et nobilior nacio mundi et homines pulcriores et forciores.
Quorum auxilio Tartari optinuerunt imperium orientis et sine
quibus nunquam habuerunt victoriam gloriosam; conduxit enim
Cingwis Caam, primus Thartarorum Rex, de eis LXXII principes,
quando voluit precepto dei castigare mundum.
2. Genuit autem Sem XXIV principes familiarum, Caam
XXXIII, Iaphet pater noster XV, et tot postmodum divise sunt
lingwe, minus tantummodo una etc. Arfaxat filius Sem anno
etatis XXXV genuit Sela vel Sale, a quo Yndia populata est
et divisa in tria regna. Quorum primum vocatur Manzi, maior
et nobilior provincia mundi pulcrior amenior et lacior, in qua
est illa nobilis civitas Campsay, Zayton, Cynkalan, Ianu et
alie multe civitates Manzi olim Cyn, ubi usque hodie est portus
et civitas nobilis, que dicitur Cynkalan, id est magna Yndia,
nam Kalan est magnum ad differenciam secunde Yndie que
dicitur Mymbar, ubi est Cynkali, id est parvum, parva Yndia.
|
|