Iacobus de Varagine: Chronica civitatis Ianuensis

107


.XL. galeas armare nobiliter potuissent, custodibus sufficientibus
in civitate et Riperia derelictis. verum quoniam Ianuenses
intellexerunt quod Veneti multa verba ampulosa et iactantie
plena protulerant et per diversas regiones tam propinquas quam
longinquas scripserant, se scilicet usque ad portum Ianue
venturos esse cum magno exercitu galearum ut ibi potentiam
suam ostenderent et iura pariter demonstrarent, ideo ex parte potestatis
et capitanei et sapientum Credentie duci Venitiarum
littere fuerunt directe, inter cetera continentes quod indecens
videretur si Ianuenses permitterent exercitum galearum
Venetorum tam longas semitas marinas percurrere, tantas equoreas
undas sulcare, tantam in navigando fatigationem assumere ut
scilicet usque ad portum Ianuensem navigando venirent. et ideo
notum eis faciunt quod dominus Obertus Aurie admiratus
cum stolo suo galearum usque in Siciliam obviam eis venit ut ibi
eos aut inveniat presentes [aut expectet absentes] et tunc ipsi
Veneti iura sua proferrent, et Ianuenses similiter iura sua producerent,
et Deus, qui est secretorum cognitor et virium omnium sapientissimus
ponderator, utriusque partis iura in iudicij sui
statera vibrabit et unicuique ius suum tribuet, prout iustum esse
prospexerit, et iustitia flagitabit. missis igitur litteris supradictis,
recessit de partibus Ianue cum suo stolo dominus admiratus
ad partes Sicilie profecturus, habens secum salutis nostre signum
salutiferum triumphale, scilicet vere Crucis vexillum. intra

Torna all'inizio