sit artium liberalium imperatrix et utriusque iuris alumpna.
ipsam aliquando librum du suffragiis allegandi, aliquando
candelabrum eloquentie, et aliquando rethoricam appellavi,
ut de ipsius adventu non valerent invidi presagire, illa
namque dominabilius imperabit, et inponet silentium oratoribus
qui sine conmuni profectu ediderunt multitudinem
preceptorum.
III.
Nunc vero ad te, meum heredem, principaliter converto
sermonem, tibi districte iubendo ut inter me ac bestiam
teterrimam que me persequi non desistit tue protectionis
clipeum interponas.
Liber.
Dissere mihi de natura et disposicione bestie contra
quam debeo dimicare.
Auctor.
Hec namque habet capita novem, cornua duplicata,
tres caudas, et quatuor pedes. quorum quodlibet per se
pugnat, per se nocet, nec percutit, sine fusione veneni.
est etiam horribilis ad videndum, et tempore aliquo non
quiescit, set terrarum orbem regirans quamlibet felicitatem
insequitur, et probitatem semper invenire satagit quam confundat.
murmurat, stridet, fremit, delirat, devorat, anxiatur,
livet, pallet, perstrepit, nauseat, delitescit, latrat,
mordet, furit, spumat, insanit, ignit, gannit quando nocere
non potest, hora tenet aperta, dentes habet accutissimos,
et linguas tanquam sagittas fulguris perignitas.
Hanc nempe ydram antiqui phylosophi esse putabant.
set crudelior est quam ydra, quia in precordiis hominum
habitat quos intus et extra conburit.
Ceterum ipsius figura terribilis vel ymago anime cogitanti
de illius venenosis morsibus et puncturis frequenter
apparuit, et quietem virtutum animalium conturbando te de
meis manibus eripere nitebatur.
Unde illam figuram tartariam in hoc loco depinxi et
sicut vidi oculis interioribus designavi, ut moderni et posteri
studeant propensius ipsius toxicata iacula evitare.
|
|