Dedicatione Aecclesiae et in omnibus festiuitatibus beatae Mariae et in
die passionis apostolorum Petri et Pauli et in caeteris festiuitatibus
aliorum apostolorum dicatur ad maiorem missam Credo in unum deum .
Nam ad matutinalem missam in conuentu nunquam dicitur.
<DE SUSCEPTIONE FESTIUA>
Quotiens disponitur ut aliqua persona cum festiua processione suscipiatur,
tangatur ter breuiter unum de maioribus signis, ut hoc signo
conueniant omnes fratres in aecclesiam ad induendum se. Et cum omnes
cappis induti fuerint, si tanta capparum copia est, aut casulis et dalmaticis
si cappae desint et pueri tunicis, exspectent sedentes in choro donec
procedant. Secretarius interim extendat unum tapetem et desuper
pallium ante maius altare super priorem gradum et similiter faciat ante
crucifixum in medio aecclesiae. His peractis cum indicatum fuerit iam
prope adesse personam, pulsentur duo maiora signa.
Tunc aliqui de maioribus accipiant aquam benedictam et caetera, quae
ad festiuam processionem portari solent; hos praecedentes sequantur
abbas et caeteri, ut sunt priores. Pueri cum magistris suis extremi
ueniant et in ordine suo stent inter duos choros, cum facta fuerit statio
ad susceptionem personae. Quae cum suscipitur, det ei abbas aspersorium
cum aqua in manum, si episcopus fuerit; aliam personam aspergat ipse.
Dehinc porrigatur ei incensum similiter ab abbate, textus a priore. Dum
haec fiunt, pulsentur omnia signa. Cantor uero incipiat cantum, qui
conueniat personae, dehinc reuertatur processio. Pueri cum magistris
suis primi ingrediantur aecclesiam, hos sequantur reliqui sicut in statione
fuerunt; extremus ueniat abbas cum suscepta persona praecedentibus eos
supradictis portitoribus.
Ingressi monasterium faciant stationem ante crucifixum. Pueri uero
similiter stent inter utrosque choros. Praedicti portitores paulatim progrediantur
per medium eorum et stent ante crucifixum uersis uultibus
ad eum. Interim oret suscepta persona. Finito cantu, surgente ea ab
oratione incipiat cantor antiphonam uel responsorium de sancto, in
cuius honore fundata est aecclesia. Tunc praecedant praedicti portitores
deposituri in locis suis ea, quae portant statim cum ad altare uenerint.
Sequantur infantes, post hos reliqui eo ordine quo superius dictum est.
Ingressi chorum stent a parte altaris ex utraque parte sicut sunt priores.
Oret iterum suscepta persona. Finito quod cantatur surgat et si episcopus |
|