Innocentio quarto in camera sua. Post festum autem Omnium
Sanctorum arripui iter, ut in Franciam irem.
De fratre Iohanne de Plano Carpi, quem papa Innocentius quartus misit ad
Tartaros.
Quod ex virtute constellationis fiunt impressiones.
Cumque pervenissem ad primum locum fratrum Minorum
qui post Lugdunum occurrit, eadem die frater Iohannes de Plano
Carpi pervenit iiluc, qui redibat a Tartaris, quo miserat eum papa
Innocentius quartus. Erat autem frater Iohannes iste familiaris
homo et spiritualis et litteratus et magnus prolocutor et in
multis expertus, et aliquando fuerat provincialis minister in
Ordine. Iste ostendit michi et aliis fratribus unam cuppam
ligneam, quam portabat ut daret domino pape; in qua cuppa
erat in fundo cuiusdam pulcherrime regine ymago, ut vidi oculis meis,
non artificialiter seu opere pictorio ibi depicta, sed ex virtute
constellationis ibi impressa. Et si in centum partes secta fuisset,
semper impressionem illius ymaginis habuisset. Et ne hoc
alicui ad credendum impossibile videatur, exemplo alio possumus
demonstrare et fidem astruere. Nam imperator Fridericus in Apulia
donavit quamdam ecclesiam fratribus Minoribus, que erat
antiquissima et destructa et ab omnibus derelicta; et in loco ubi
altare fuerat prius, immense magnitudinis creverat arbor nucis,
que secta in qualibet asside Domini nostri Iesu Christi crucifixi
habebat ymaginem. Et si cencies secata fuisset, totiens crucifixi
ymagmem habuisset. Quod, quamvis ex miraculo hoc demonstraverit
Deus, eo quod in illo loco nata sit nucis arbor in quo
agni immaculati passio representatur in hostia salutari et sacrificio
reverendo, tamen ex virtute constellationis tales impressiones
posse fieri aliqui asseverant.
Item idem frater Iohannes dixit nobis quod pulcherrimam
capellam portabat ad donandum domino pape. Et appellabat
capellam, ut nobis exposuit, omnia pontificalia paramenta que
ad missam celebrandam diebus sollemnibus necessario requiruntur.
|
|