Item nota, quod summa urbanitas est rethoricorum colorum
flosculis dictamina purpurare, et circumvallare proverbiis
sapientum, et maiorum doctorum auctoritatibus insignire;
nec alicuius urbanitatis pretextu auctoritatis verba debes
transponere vel mutare. De quibus breviter supponamus.
CIIII.
De ornatu orationis et coloribus rethoricis.
Ornatus orationis elegantia, compositione ac dignitate
conficitur. Elegantia facit orationem latinitate puram et explanatione
conspicuam; latinitas barbarismum et solecismum
relegat. Explanatio verbis usitatis et propriis, seu competenter
aliunde translatis reddit orationem lucidam et apertam. Conpositio
efficit omnes partes orationes equabiliter perpolitas,
cuiuslibet inconcinnitatis vitiis relegatis. Dignitas est que orationem
quarumdam exornationum varietate colorat. De quibus
sub compendio videamus.
CV.
Quid sit repetitio.
Repetitio est cum plures orationes continue ab eadem
incipiant dictione, hoc modo: «Liberalitas confert famam,
liberalitas placat Dominum, liberalitas dat honores».
CVI.
De conversione.
Conversio est cum plures orationes continue fine simili
terminantur, videlicet hoc modo: «Se ipsum odit avarus
in mundo nil est scelestius quam avarus».
|
|