25. Herodes magis clam uocatis, inquiens:
“Ite, uidete ubi est, recurrite,
referte michi, ut et ego ueniens
adorem eum.”
26. Vulpes Herodes, cur cauda dissimulas
predam captare, qui beluino gutture
sanguinem sitis, agni carnes esuris,
lupe crudelis?
27. Non uales tuam saciare rabiem,
non agnus ille singularis moritur.
Nam, uelis nolis, ipse rex est Israhel,
rerum creator.
28. Mori dignatur alio in tempore,
quando de cruce preciosi fuderit
sanguinis undam, que mundi mortifera
crimina tollat.
29. Quid fremis pestis? Iste rex omnipotens
non querit tuum regnum, tibi poterat
donare suum, si non esses perfidus,
ualde superbus.
30. Quos iugulasti teneros agniculos
sanguinulento, maledicte, gladio,
ablactat uiuos in ouile proprio
pastor benignus.
31. Euntes magi, stella noua praeuia
hos precedebat, donec uenit, steterat,
ubi tunc puer erat in cunabulis,
redemptor orbis.
|
|