Te plastes a ventre matris dignatur protegere,
Ipso quidem obumbrante quis valet te ledere?
Versipelles morientur in proprio scelere.
Ergo, rex, omnipotenti semper refer gracias,
Deprecare, quo suetas non neget pancracias,
Donec eodem iubente finem vitę facias.
Quanta tibi facit deus , sis memor cottidie,
Te sequentibus appare ut sol in meridie,
Noctis speciem ostende fìliis perfidię.
Legifer es dante deo in subiectis gentibus,
Aequa lance pensa pondus parvis et potentibus;
Sic ius legis temperabis sub te quiescentibus.
Mercennarii mercedem lex iubet ne teneas;
Pro hac culpa cautus esto, rex bone, ne pereas;
Imple legem, non videbis phalanges funereas.
Si Benzoni, servo tuo, suum reddis meritum,
Evanescet velut fumus excursus proselitum;
Ad apostasiam versi ibunt in interitum .
Terga vertent universi spiritus silvatici,
Patarini et ambrones simul et artabati
Atque ligna colligentes sacro die sabbati.
|
|