continuo patrocinium tue sancte procuracionis recepi. Et ecce nunc
afflictus et derelictus solus in terra longinqua, debilis in corpore, tristis
in corde et quasi totaliter consternatus in mente, ad te clamo exsul
non solum filius Eve, set filius multorum; ve, ve michi misero, ve
michi, quia eo tempore veni de partibus occidentis ad orientalem
plagam, ut predicarem Christum et baptizarem et gremio sancte
matris ecclesie aggregarem, quo audio et video aggregatos dispergari
et dispergi. Et iam non solum de gremio, set de corde sancte matris
ecclesie rapiuntur et occiduntur et venales transmittuntur christiani
usque Baldactum et usque ad orientales remotissimas regiones pre
multitudine captivorum. Et circumspiciens diligenter et querens, si
forte aliquos ex fratribus meis Predicatoribus invenirem inter captivos
et, ecce michi nunciantur omnes occisi; senes et parvuli christiani
venduntur extraneis. Calices et palle et alia ornamenta altarium spiritualibus
ministeriis consecrata, de mensa Christi et de ministerio
corporis et sanguinis Domini transeunt ad mensas Sarracenorum, libri
prophetarum et evangeliorum canibus exponuntur, et quod omnibus
aliis miserabilius est, sanctimoniales et virgines, tuo sanctissimo filio
desponsate pulcriores eliguntur ex eis et ensenia mittuntur Sarracenorum
regibus et eorum tyrannis, ut ex eis generent filios Sarracenorum.
Alie vero venduntur et distrahuntur et dantur histrionibus, ut
circumducant eas per mundum ad ignominiam christianorum et tui
sanctissimi filii Iesus Christi. O Domina, nos accepimus, quod filius
tuus candor est lucis eterne et speculum sine macula, cui non placet,
nisi quod purum. Sed numquid ei magis placet, quod sanctimoniales
et virgines cogantur esse histrionisse et discurrant per mundum,
quam in monasterio Deo decantent et spiritualibus ministerijs occupentur?
Numquid ei magis placet, quod sanctimoniales et sibi virgines
consecrate sint sclave et concubine Sarracenorum et Sarracenos filios
generent Sarracenis, quam conceptum votum virginitatis conservent
et ex ipso sanctissimo filio tuo feruore Spiritus Sancti concipiant
sanctos conceptus sancta contemplacione ut pariant obsequia caritatis?
O Domina, ecce iam compleri videtur, quod ipse Machometus
mendacissinius dixit, se missum esse a Deo in virtute armorum,
ut multos filios generet ut Sarracenorum populus augeretur. Numquid
deerant et alie mulieres, ex quibus filios genuissent, etsi non dedisset
ei ancillas suas, virgines sanctimoniales sibi dicatas et desponsatas
ab adolescentia sua? Quid negabit Christus, filius tuus, ulterius
Machometo, si concedit ei ancillas et sponsas ipsius? Non
|
|