XX.
De electione episcopi
littere electionis de capitulo ad capitulum.
Multimode honestatis domino I. arcidiacono Brixiensi, tam
honestate morum quam sapientie luce fulgenti, prepositus et
capitulum ecclesie Imolensis reverentiam in omnibus cum salute.
Bone memorie B. presule nostro viam universe carnis
ingresso, ne diu vacanti ecclesie cure deesset officii pastoralis,
ad campane sonitum convenientes in unum, invocata
gratia Sancti Spiritus, quasi celitus inspirati, vos, in cuius
persona conveniunt universe que in antistite iure canonico
requiruntur, in nostrum episcopum elegimus una voce, nullo
penitus discrepante; quod dicitur diligentius intuentes « Si
navis perito rectori committitur, nunquam de facili ventorum
incursibus conquassatur ». Unde benignitati vestre per
duos ex fratribus nostris litterarum latores, viros non modica
discretione conspicuos, decretum electionis mittentes omnium
subscriptionibus roboratum, vestram prudentiam multiplicatis
precibus exoramus, ut electionem prefatam recipere dignemini
sic canonice celebratam, ad ecclesiam et civitatem nostram
venientes fiducialiter et gaudenter, et ad Dei servitium et
beati Petri apostoli benedicti; ubi clerus et populus cum gaudio
vos expectant, incrementa spiritualia sperantes recipere per
vestra salutaria documenta.
XXI.
Responsiva electi recipientis episcopatum.
Benignitatis vestre voluntatibus contradicere non presumo,
timens ne arrogantie vitio scriberetur, quod faceret ex humilitate
|
|