susceptae fidei concedimus et confirmamus perpetuo
libertatem: nec non omnes immunitates
quibus uti consueverunt, priusquam converterentur
ad fidem. Eximimus insuper eos
etiam a servitute, et jurisdictione regum, ducum,
et principum, comitum et caeterorum
magnatum, praesenti sancientes edicto, ut
non nisi sacrae sanctae matris Ecclesiae, ac Romano
Imperio, quemadmodum alii liberi
homines Imperii, teneantur. Nullusque eos
contra praesentis protectionis, defensionis,
concessionis, et confirmationis nostrae paginam,
impetere, molestare, offendere, vel
eorum quietem turbare praesumat: quod qui
praesumpserit, indignationem nostram et Imperii,
se noverit graviter incursurum. Quare
universitatem vestram hortando et rogando
monemus, attentius exhortantes: quatenus
praedictas gentes accedentes ad fidem, ob
illius amorem , cujus intuitu et inspiratione
ducuntur, qui eas denuo ad se
vocat, benigne protegere, fovere ac tueri potenter
ab incursibus malignorum, et ob reverentiam
Imperii commendatas habere velitis:
ut universos et singulos possimus exinde
merito commendare.