et Guelfi et inceperunt prelium in civitate cum illis de Sesso
et expulerunt eos extra civitatem Regium cum exterminato furore.
Et illi de Sesso tunc iverunt cum illis de parte sua Raçolum,
et quasi omnes de populo partis de Sesso fuerunt positi in
confinibus prope civitatem, ad tria miliaria desupra ad civitatem,
et omnes affidhati fuerunt preter illos de Sesso. Item
Roberti incontinenti fecerunt potestatem dominum Iacobinum
Rangonum de Mutina et deposuerunt dominum Marcum Grandonicum
de Venetiis. In quo anno ceperunt domini de Sesso castrum
de Canulis; et postea pars Robertorum recuperavit illud.
Et de treugua inter eos postmodum ordinata.
Et eo anno facta et ordinata fuit treugua inter intrinsecos et
extrinsecos civitatis Regii a festo sancti Petri usque ad festum
sancti Michaelis, et fuit ordinata per fratres Predicatores, scilicet
fratrem Fredericum, priorem dictorum fratrum, et per fratrem
Peregrinum lectorem et per fratrem Petrum de Fulconibus, et
per quosdam fratres Minores. Ex qua treugua magnam utilitatem
habuerunt homines de Regio, tam intrinseci quam forenses.
De adventu Gallicorum in succursum regis Karoli contra Manfredum imperatoris
filium; et de filiis imperatoris condam Friderici secundi.
In quo anno, circa festum Nativitatis Domini, venerunt Gallici
in magna multitudine in adiutorium Karoli fratris regis Francie,
qui erat Rome; et ego vidi eos venientes, cum irem ad Sanctum
Proculum de Faventia ad predicandum in festo sancti Iohannis
evangeliste. Et iverunt in Apuliam contra Manfredum filium
Friderici condam imperatoris ad debellandum eum. Et interfecerunt
eum anno Dominice Incarnationis MCCLXVI, circa Pascha,
et abstulerunt omnia que habebat. Et accidit grande miraculum,
quia, illo anno quo venerunt, non fuit frigus nec gelu
nec glacies nec nix nec lutum nec pluvia, sed via pulcherrima,
|
|