Pag 96

Karoli et tres Ottones, HEINRICI gemini,
Inter quos et Chuonradus suo compar semini,
Quod patrarunt, satis patet ex eorum chronicis,
In ęternum sociati regibus catholicis.
Sed de cesare augusto HEINRICO tercio,
Qui est pervigil in belli pacisque commercio,
Quis audebit eius facta commendare litteris?
Danihel succubuisset doctior presbiteris.
Tullius namque Romanus et Grecus Demostenes,
Omnium rethoricorum qui noscuntur proceres,
Fugerent eius notare tam multa certamina
Neque stilo, neque penna, neque plumbi lammina.
Maro vates Mantuanus, Lucanus et Statius,
Pindarus seu Homerus et noster Horatius,
Grillius, Quintilianus, comicus Terrentius
Formidassent regis opus, quo nil excellentius.