Tempore Decii Fabianus papa suscepit martyrium. Cui successit Cornelius papa. Tunc etiam Ierusolimis Alexander
episcopus martirio est coronatus. Eracle etiam episcopus Alexandrie similiter. Cui episcopus Dionisius succedit.
Cornelio papa martyrio coronato, succedit Lucius. Quo cito mortuo, succedit Stefanus papa. Cetera versus dicunt.
Item de Detio imperatore, 25. ab Augusto, qui regnat ann. 1.
Decius unius anni diadema recepit,
Emulus ecclesie, divina repellere cepit,
Sepeque christicolis verbera seva dedit.
Antonius monachus recolendo nomine clarus
Vivit in Egypto nunc, summus anachoritarum,
Cuius ab exemplis non tenet ordo parum.
Decius in populum dum iure suo dominatur,
Papa simul Lucius tenet Urbis pontificatum,
Orbe coequevo pollet utrumque caput.
32. De Valeriano et Gallieno imperatoribus, 26. ab Augusto, qui regn. ann. 15.
Anno ab incarnatione Domini 259. post Augustum loco 26. Valerianus in Gretia, Galienus autem a senatu Rome
cesares creantur. Isti octavam post Neronem in christianos persecutionem moverunt. His diebus papa Sistus Rome
et Cyprianus in Cartagine martirio consumuntur. Sisto successit Dionisius. Imperator autem Valerianus captus a
rege Persarum nomine Sapore cecatur, et quamdiu vixit, regi Persarum equum ascendere volenti dorsum suum
curvavit, et ille per dorsum eius tamquam per strepam semper equum asscendit. Galienus autem tam miserabili
socii sui motus exemplo, erga christianos postea mitior est inventus, et datis decretis instituit, ut, quocumque more
quisque velit, teneat quod divinum est. [Galienus tandem Saporem regem Persarum ad Romanum imperium
traxit et Ciliades devicit. His temporibus Postumus cesar et filius eius Postumus iunior brevi spatio interemti sunt.
Tunc etiam Lolianus cesar a suis occisus est. Victorinus cesar et Victorinus iunior seditione suorum cito occisi sunt.
Similiter Marius cesar periit. Regilianus in Illirico imperator est factus. Aureolus coactus a militibus sumpsit imperium.]
His diebus Alemanni Ytaliam depopulantur. Gothi Greciam, Macedoniam, Pontum et Asiam pervagantur.
Guandalii et Sarmate Pannonias armati ingrediuntur. Ispania quoque Iermanorum inundatione deletur. Parthi autem
Siria et Mesopotamia potiuntur. His malis res publica intus et exterius minoratur. Galienus, deserta re publica, aput
Mediolanum interfectus est. Tunc mortuo papa Dionisio, Felix papa successit. Ea tempestate apparuerunt Manichei.
Quidam enim homo nomine Manes, Perses, moribus et actibus barbarus, exsecrabilem heresim docuit.
Nunc enim Christum se esse dicebat, nunc etiam se esse Paraclitum predicabat, atque ad similitudinem Christi duodecim
discipulos suos ad predicandum mittebat, habens docmata a prioribus hereticis mutuata. Cuius sectatores usque
hodie Manichei vocantur. [Valeriano imperatore capto, Valerius rex Cadusiorum sic scripsit: Captum Valerianum principem
principum non satis gratulor; magis gratularer, si redderetur. Romani enim graviores tunc sunt, quando vincuntur. Valerianus
iunior, specie formosus, miserabiliter est interemptus, qui regnavit annis 6.]
Item de eodem Valeriano imperatore, 26. ab Augusto.
Imperii Valerianus dum captat honorem,
Gothica gens validos revocat per regna dolores,
Bella Macedonibus pernitiemque movet.
Christicolas Valerianus dum persequeretur,
A Persis capitur, cecatur, ibique tenetur,
Ludibrium Persis pernitiesque suis.
Nam quotiens Persarum rex equitare volebat,
In dorso Valeriani ceci residebat,
Quo conculcato post residebat equo.
P. 171 v. 13 post caput addit A:] De Francis.
Nunc dux Francorum Pippinus Nanus habetur,
Nec probitate minor, sed maior ubique putetur,
Regni defensor ecclesieque decus.
|
|