1. Domino Cambio de Podiobonici.
Sepenumero de fortune malignitate conquereris, domine Cambi, quod
coniugem puerperam non habes, que et tui suique voti in suscipienda sobole
non compos anxiatur. Essent enim sibi castissimi amoris pignora
certissima; pignora, que ut habeat, suscipiat, ablactet, nominet, basiet,
neniet, tota cum mente suspirat. Indulgendum est enim, si mater esse
desiderat: feminarum namque precipuum munus est concipere tuerique
conceptum: quod ubi non datur, apud viros, quamvis uxorios, contemptui
se esse arbitrantur. Tibi quidem non ita nec sic ex facili parcendum,
si liberorum cura supra modum afficereris, sollicitareris, inquietareris.
2. Neque enim illos tulerim steriles viros qui ob id balnea frequentant,
peregrinarum succos herbarum epotant, potiones sorbillant et, quod ridiculosius
est, anicularum imprecationibus credunt usque ad phylateria
curiosi et cartularum virginalium appendia, quo nihil profecto insulsius.
Nec tamen improbo filiorum vota modestie freno cohibita, ad quorum
susceptionem ipsa suis stimulis natura et invitat et cogit.
3. Tu mihi obicies longe facilius esse superfluos liberorum procreandorum
affectus culpare, quam vitare: recta enim consilia facilius dantur
quam peraguntur. Nec ego diffiteri habeo; tamen ut vir sis virium et
virtutum exercitatus cupio mihique credas volo, qui utramvis partem
expertus de his rectius indicaverim. 4. Precessit uxor alia istam quam
habeo dilectissimam mihi. Illa me patrem non fecit, infecunda; ista
plurium parentem effecit, quorum alii non ista, sed perpetua et vera
luce perfruuntur, in ipso pene vite lumine revocati; tres satis belli pueri
etherea mecum aura vescuntur; dulces equidem mihi, sed ubi singula
rationis libramine appendas velisque sentire utrum cum filiis amaris
|
|