apostolorum principis sic clerum et populum Romanum allocutus est: "Viri fratres,
audivi legationem vestram, cui me contradicere non oportuit, et huc ad vos descendi,
primum orationis voto, dein vestris volens obtemperare iussionibus". Cui cum episcopi
et cardinales hoc ei respondentes dicerent: "Hec fuit causa te vocandi, ut te nobis
eligeremus pontificem", et archidiaconus ex more clamaret: "Domnum Leonem pontificem
sanctus Petrus elegit" populusque subsequens vocibus iteratis hoc concreparet, cardinales
et episcopi, ut moris est, beatorum apostolorum principis cathedrę [eum] intronizarunt.
Postquam papalem adeptus est dignitatem, venerabilem Ildebrandum, donatorem
tam salubris consilii, quem ab abbate multis precibus vix impetraverat ad subdiaconatus
provexit honorem, quem et economum sanctę Romanę ecclesię constituit.
Cuius consilio synodum mox congregavit, in qua diversarum regionum episcopi convenerunt,
in qua etiam sub anathemate interdictum est non licere alicui episcopo archidiaconatus
et preposituras vel abbacias seu beneficia ęcclesiarum vel prebendas vel
ecclesiarum vel altarium commendationes vendere, et ut sacerdotes et levitę, et subdiaconi
cum uxoribus non coeant; quę res magnam veternosum serpentem concitavit
in iram. Quod audientes episcopi, primo quidem veritati non valentes resistere tacuere,
postea vero suadente humani generis inimico inobedientes celavere.
Interea Romę episcopi et cardinales et abbates per symoniacam heresim ordinati
deponebantur, et ibi ex diversis provinciis alii ordinabantur, ut ex Lugdunensi Gallia
Ubertus Silve-candide episcopus et ex Burgundionum genere Stephanus abbas et
cardinalis et ex Romerici-monte Ugo Candidus, qui postea apostata est effectus, et
Fridericus ducis Gottefridis germanus et ex Compendio quidam Azelinus Sutrinus
episcopus et ex Ravennatium partibus Petrus Damiani, vir eloquentissimus, et alii
quam plures. Tunc fortis armatus, qui in multa pace custodierat atrium suum,
sensit se obligatum.
|
1
5
10
15
20
25
|