autem hoc testimonium in usitata translatione Osee,
sic scriptum: Ero mors tua, o mors! quod idem
significat; ipse enim vincit, qui fidelibus suis vincendi
tribuit facultatem.
53. AMBROS. Ubi est, mors, victoria tua? Insultantis
etenim verba sunt.
54. AUGUST. (lib. III De pec. merit. et remiss.,
cap. 11, tom. VII.) Stimulus mortis . Quo mors facta
est, non quem mors fecit. Peccato enim morimur,
non morte peccamus. Sic itaque dictum est: Aculeus
mortis quomodo lignum vitae? Non quod hominis
vitam [ al. , vita] faceret, sed quo vita hominis
fieret. Et quomodo lignum scientiae, per quod scientia
fieret hominis, non quod per suam scientiam
fecerit homo.
55. LANFR. Stimulus mortis . Probat mortis stimulum
esse destructum. Stimulus, inquit, mortis peccatum
est, hoc autem destructum est. Probat, nam
per victoriam est destructum, quam dedit nobis Deus
per Dominum nostrum Jesum Christum (prius a pari,
posterius a parte), nonne per legem destructum est
peccatum? Non [ f. , nam] lex fuit augmentum peccati,
non destructio.
56. AUGUST. ( lib. De perfect. justi hominis , c. 6,
t. VII.) Virtus vero peccati lex . Quoniam lex prohibendo
auget peccati cupiditatem, nisi diffundat Spiritus
charitatem.
CAP. XVI.—1. AUGUST. (lib. II De sermone Domini
in monte , cap. 17, tom. IV.). De collectis autem .
Apostolus Paulus potest videri de crastino cogitare,
cum dicit: De collectis autem in sanctos, sicut ordinavi
Ecclesiis Galatiae, ita et vos facite, secundum
unam Sabbati. Unusquisque vestrum apud se ponat,
thesaurizans quod ei placuerit, ut non, cum venero,
tunc collectae fiant . His et hujusmodi Scripturarum
locis satis apparet Dominum nostrum non hoc improbare,
si quis humano more ista procuret, sed si
quis propter ista Deo militet.
|
|