III
1. (1) INCIPIT TERTIUS.
DE TRIBUS DICTAMINUM GENERIBUS
PRIMO LOCO.
(2) Generalia que in omni exquisito dictamine requiruntur
superius expedivimus diligenter. Nam sive sermonem vel epistolam
sive librum vel aliud opus digna et artificiali oratione
componere mediteris, ab his que diximus non est ullatenus declinandum.
(3) Sed amodo ad specialia descendentes, illud in primis dicere
nos oportet quod tria dictandi genera distinguntur, scilicet
prosaicum, metricum et rihmicum vel etiam aliquod ex his
mixtum.
(4) Prosaicum est in quo licet nobis liberius evagari quia sub
lege metri vel rithimi aliqua non artatur; unde comunis sermo
dicitur a Donato, ut: 'In principio erat verbum'. (5) Et dicitur
a 'proson', quod est 'longum' vel dicitur 'prosa', quasi 'profusa'
quia secundum arbitrium dictatoris potest longius prorogari