Pag 170

Comes Gabardus de ... erat lungus in membris,
formosus, quasi subruffus, capillis longis et quasi nigris et
quodammodo crispis; in bello fortissimus, honoris avidus,
largus, dapsilis, hilaris atque iocundus.
Comes Marchoardus de Grumbac erat et ipse similiter
longus et bene formatus, nigris capillis et longis, et in predictis
omnibus probitatibus comiti Gabardo similis.
Marchio vero Gulielmus de Monferato, qui Longobardus
erat, fuit mediocris stature, bene compositus et spissus, facie
rotonda et subruffa, capillis quasi albis, maxime loquax,
virtuosus et sapiens, hilaris atque iocundus, munificus, non
prodigus.
Comes Guido de Blandrate erat parve stature, grossus in
pectore et membris, facie quasi subnigra, capillis nigris, calvus
aliquantulum; miles optimus, providus in bello, mirabiliter
loquax, audax vehementer, consilio pollens, magni laboris
patiens, imperatori fideliter serviens ac ab eo quam plurimum
dilectus.
Comes Conradus de Ballanuce erat stature non magne,
albus, facie formosa, capillis albis; litteratus et sapiens, dulcis
et affabilis, providus et in bello strenuus, tam lingua Teutonica
quam Ytalica doctus, et in consiliis imperatoris maxime potens.