Blondus Flavius Foroliviensis: Historiarum Ab Inclinatone Romanorum Quartae Decadis Liber Secundus

Pag 20


equitum millia sub rege suo ducentem, alter maioris ilio potentatus
viri, quem appellant officio regis cancellarium, natus esset,
et mense quam a pontifice profectus erat vigesimo quarto, illos
Florentiam ducens ostendit, si ea qua oporteret cura negotio incumberetur,
fore ut maxima innumerabilisque illa populorum multitudo
christianae religionis et nominis christiani redintegraretur
dignitati, per cuius gentis potentiam postea facillimum foret barbaros
Christi hostes Hierosolyma et sanctis Syriae locis quae
tamdiu occupant deturbare.
XXXIV. Hi octo monachi ad pontificis cardinaliumque et totius
Romanae curiae conspectum publico in loco perducti, mandata,
quae in Arabico scripta ostendebant, binis interpretibus, quorum
unus esset Arabs alter Latinus, alternis referentibus, in hanc sententiam
exposuere. Omnes homines ad tuam praesentiam pervenientes,
pater beantissime, multas tenentur Deo gratias agere, quod eos
fecerit dignos videre in te Christum etiam in terris inter peccatores
homines conversantem. Sed nos in Aethiopia nati multis magnisque
cogimur rationibus, nulli alteri nationi communibus, laudare ac
benedicere Deum, qui nobis dedit sacram faciem tuam praesenti
tempore intueri, primum quod neminem credimus remotiori ab orbis
parte huc se conferre quam nos, qui non extremam modo orbis partem,
sed paene extra ipsum orbem positam, incolimus Aethiopiam:
secundo quia, salva ceterorum pace, non credimus gentem esse aliam,
quae maiori fide et devotione Romanum pontificem veneretur; quod
quidem adeo ab experientia apud nos notorium esse dinoscitur, ut
reversuri in patriam applausus exultationesque nostrorum timere
cogamur; quia semper hactenus observatum est, ut venientium a
Romani pontificis conspectu plebs et omnis sexus aetatisque multitudo
conferta pedes osculari, et vestis partem pro reliquiis servandam
lacerare contendat. Unde intelligi potest quanta sit nostris hominibus
Romani pontificis opinio sanctitatis. Videtur tertio loco maiori excipiendum
laetitia et iubilo gaudium nostrum, quo maius imperium
nostrum quam aliquod aliud esse opinamur, si quidem reges centum
nostro imperio etiam praesenti tempore sunt subiecti. Est etiam gloriae
nostrae pars non minima regina Saba, quae excita fama
sapientiae Salomonis ita se contulit Hierosolymam, quemadmodum
nos qui, licet multo minores simus Saba regina, ad te venimus,
qui es etiam plus quam Salomon: ex gente item nostra fuerunt Candacis
regina et eunuchus, quos Philippus Domini apostolus baptizavit.

Torna all'inizio